11 வயது சிறுமியைப் பலாத்காரம் செய்து கொன்ற 11 ஆம் வகுப்பு மாணவன்!

Madurai during Monsoon Season

11 வயது சிறுமியை 11 ஆம் வகுப்பு படிக்கும் பள்ளி மாணவன் பலாத்காரம் செய்து கொன்ற அதிர்ச்சியளிக்கும் சம்பவம் மதுரையில் நடந்துள்ளது. சம்பவம் தொடர்பாக மாணவனைக் காவல்துறையினர் கைது செய்தனர்.

மதுரை மாவட்டம் திருமங்கலம் டவுன் காவல்துறை சரகம் பெரியமறவன் குளத்தைச் சேர்ந்த கண்ணன் என்பவரின் 11 வயது மகள் அருணா, கடந்த 3-ந்தேதி குப்பை மேட்டில் பிணமாக கிடந்தார்.

இது தொடர்பாக தனிப்படை காவல்துறையினர் தீவிர விசாரணை மேற்கொண்டனர். விசாரணையில் பெரியமறவன் குளத்தைச் சேர்ந்த 11 ஆம் வகுப்பு படிக்கும் மாணவர் பாலசந்தர்(16) என்பவர்தான் அருணாவைக் கொலை செய்தது உறுதியானது. காவல்துறைனர் தன்னைத் தேடுவதை அறிந்த பாலச்சந்தர் திருமங்கலம் துணை தாசில்தாரிடம் சரண் அடைந்தார்.

குற்றத்தை ஒப்புக்கொண்ட பாலசந்தர், சிறுமையை எவ்வாறு கொன்றார் என்பதை வாக்குமூலமாக காவல்துறையிடம் தெரிவித்துள்ளார்.

அதில், “கடந்த சனிக்கிழமை இரவு பெரியமறவன் குளத்தில் கோவில் விழாவையொட்டி நாடகம் நடந்தது. நாடகம் பார்த்துவிட்டு அருணா வீட்டுக்கு வந்து கொண்டிருந்தாள். அவளை அப்பகுதியில் உள்ள வயல் காட்டுக்குக் கடத்திச் சென்றேன்.

அங்கு பலாத்காரம் செய்தேன். இதில் அருணா மயங்கி விட்டாள். பயந்துபோன நான் விசயத்தை வெளியே சொல்லி விடுவாளோ? என கருதி அங்கு கிடந்த மின் வடத்தால் அருணாவைக் கழுத்தை நெரித்து கொன்றேன். பின்னர் பிணத்தை அங்கு உள்ள குப்பை மேட்டில் வீசி விட்டு தலை மறைவானேன். காவல்துறையினர் என்னைத் தேடுவதை அறிந்து சரண் அடைந்தேன்” என்று கூறியுள்ளார்.

சிறுமியைப் பள்ளி மாணவன் பலாத்காரம் செய்து கொன்ற சம்பவம் மக்களிடையே பெரும் அதிர்ச்சியை ஏற்படுத்தியுள்ளது.

inneram.com

ஓமன் நாட்டில் வேலைவாய்ப்பு!

“பத்தாம் வகுப்பு தேர்ச்சி பெற்ற தொழிலாளர்களுக்கு ஓமன் நாட்டில் வேலைவாய்ப்பு உள்ளது” என தமிழக அரசின் அயல்நாட்டு வேலைவாய்ப்பு நிறுவனம் அறிவித்துள்ளது.

விசா,​​ விமான பயணச்சீட்டு,​​ தங்குமிடம் ஆகியவை வேலைக்கு அமர்த்தும் நிறுவனத்தால் இலவசமாக வழங்கப்படும். இவ்வேலைக்குப் பத்தாம் வகுப்பு தேர்ச்சி பெற்றிருப்பதோடு, 22 முதல் 26 வயதுக்குட்பட்டிருக்க வேண்டும்,​​ தேர்வு செய்யப்படும் வேலையில் ஒரு ஆண்டு அனுபவம் பெற்ற,​​ திருமணமாகாதவர்கள் இதற்கு விண்ணப்பிக்கலாம்.

விண்ணப்பிக்க விரும்புபவர்கள் தட்டச்சு செய்யப்பட்ட தங்களின் விண்ணப்பத்துடன்,​​ கல்வி,​​ அனுபவம்,​​ பாஸ்போர்ட் ஆகியவற்றின் நகல்களுடன் ஏப்ரல் 10-ம் தேதி திருச்சி மற்றும் திருவெறும்பூர் அரசு தொழிற்பயிற்சி நிலையத்தில் நடைபெறும் நேர்முகத் தேர்வில் கலந்து கொள்ளலாம்.

மேலும் விவரங்களுக்குக் கீழ்கண்ட தொலைபேசி எண்களில் தொடர்பு கொள்ளலாம்:

99403 93617,​ 94436 90272.

inneram.com

விதர்பா பிரச்சினையைத் தீர்க்க இஸ்லாமிய வங்கியே தீர்வு- எம்.எஸ்.சுவாமிநாதன்

சென்னை: விதர்பாவில் விவசாயிகள் தற்கொலை தொடர் கதையாகியுள்ளதைத் தீர்க்க இஸ்லாமிய வங்கி முறை சரியான தீர்வாக அமையும் என்று இந்திய பசுமைப் புரட்சியின் தந்தை என புகழப்படும் டாக்டர் எம்.எஸ்.சுவாமிநாதன் கூறியுள்ளார்.

கருணா ரத்னா விருது வழங்கும் விழாவில் கலந்து கொண்டு அவர் பேசுகையில், விதர்பா பகுதியில், வட்டிக்குப் பணம் கொடுப்பவர்கள் அதிக வட்டிக்குப் பணம் வசூலிப்பதால் அங்குள்ள விவசாயிகள் பெரும் கடனாளியாக மாறியுள்ளனர். இதனால் கடன் தொல்லை தாங்க முடியாமல் அவர்கள் விரக்திக்குத் தள்ளப்பட்டு தற்கொலை முடிவை நாடுகின்றனர்.

நேற்று கூட 30 பேர் அங்கு தற்கொலை செய்து கொண்டுள்ளதாக தகவல்கள் கிடைத்துள்ளன. வட்டியே இல்லாமல் கடன் கொடுக்கும் இஸ்லாமிய வங்கி முறையை அங்கு அமல்படுத்த வேண்டும். அதுதான் அங்குள்ள பிரச்சினைக்குத் தீர்வு காண உதவும்.

சிறு வயதில் எனது பெற்றோர் என்னிடம் இருந்த நகைகளை காந்திஜியிடம் வழங்குமாறு அறிவுறுத்தினர். இவ்வாறு தானமாக பெறப்பட்ட நகைகளை காந்திஜி ஏலத்தில் விட்டு அதில் கிடைத்த பணத்தைக் கொண்டு ஹரிஜன மக்களுக்கு உதவினார் காந்தி. எனது தந்தை ஒரு சுதந்திரப் போராட்ட வீரர் . நம்மிடம் உபரியாக உள்ளதை இல்லாதவர்களுக்குக் கொடுக்க வேண்டும் என்று அவர் கூறுவார். அதனபடி என்னிடம் இருந்த தங்கச் சங்கிலி மற்றும் கை வளையத்தை காந்தியிடம் கொடுத்தேன் என்றார் சுவாமிநாதன்.

கருணா ரத்னா விருது என்பது சுற்றுச்சூழலியல் மற்றும் சைவம் மீதான அகிம்சை, அன்பு .ஆகியவற்றை சிறந்த முறையில் வெளிப்படுத்திப் பணியாற்றுவோருக்கு வழங்கப்படும் விருதாகும். சென்னையைச் சேர்ந்த கருணா இன்டர்நேஷனல் அமைப்பு இந்த விருதுகளை வழங்குகிறது.

இந்த விருதினை இஸ்லாம் மற்றும் சைவம் குறித்த ஆய்வுக்காக பத்மஸ்ரீ விருது பெற்ற முசாபர் ஹூசேன், புளூ கிராஸ் அமைப்பைச் சேர்ந்த சின்னி கிருஷ்ணா, சிபிஆர் பவுண்டேஷனைச் சேர்ந்த நந்திதா கிருஷ்ணா ஆகியோர் உள்ளிட்ட நான்கு பேர் பெற்றனர். அவர்களுக்கு விருதுடன் தலா ரூ. 1 லட்சம் பரிசும் அளிக்கப்பட்டது.

எம்ஜிஆர் பல்கலை மருத்துவ மாணவிகள் ‘டி-சர்ட்’ அணிய தடை!

சென்னை: சென்னை எம்ஜிஆர் மருத்துவ பல்கலைக்கழகத்தின் 15 கல்லூரிகளிலும் மாணவ, மாணவிகள் ஜீன்ஸ், டிசர்ட் உள்ளிட்டவை அணிய தடை விதிக்கப்பட்டுள்ளது.

MGR Medical Varsity

வரும் கல்வியாண்டு முதல் இந்த பல்கலைக்கழக மருத்துவ மாணவர்கள் சாதாரண ஃபார்மல் ஆடைகளையும், மாணவிகள் சல்வார் அல்லது புடவை அணிய வேண்டும் என பல்கலை நிர்வாகம் அறிவித்துள்ளது.

ஜீன்ஸ், டிசர்ட், ஸ்கர்ட், மிடி, ஸ்போர்ட்ஸ் ஷூ, நகைகள், பெர்ஃபியூம்கள் பயன்படுத்துவதை பல்கலைக்கழக நிர்வாகம் தடை செய்துள்ளது.

வரும் கல்வியாண்டு முதல் இந்த சட்டதிட்டங்கள் முழுமையாக அமலுக்கு வரும் என பல்கலை துணைவேந்தர் மயில்வாகனன் தெரிவித்துள்ளார்.

இதுபற்றி அவர் சென்னையில் நிருபர்களிடம் தெரிவிக்கையில், ‘நான் இளைஞர்கள் விருப்ப ஆடை அணியக்கூடாது என நினைப்பவன் அல்ல.

மருத்துவம் சார்ந்த சூழலில் சில ஒழுக்க முறைகளை நாம் பின்பற்றியாக வேண்டும். பூக்கள், வாசனை பொருட்கள், விரல் நகங்கள் போன்றவை நோயாளிகளுக்கு பாதிப்பை ஏற்படுத்தக் கூடியவை என்பதால் அவற்றை தவிர்க்க வேண்டும்.

மேலும் நோயாளிகளின் மனதை திசை திருப்பும் வகையில் மாணவிகள் ஆடைகள் அணிவதை தவிர்ப்பது நல்லது என்ற அடிப்படையில் மாணவிகள் டீசர்ட் போன்றவற்றை தவிர்க்க அறிவுறுத்தி உள்ளோம்’ என்றார்.

ஆனால், துணைவேந்தரின் இந்த அறிவிப்பால் மாணவர்கள் அதிருப்தி அடைந்துள்ளனர். ‘மிக சொற்பமான விலையில் டி-சர்ட் கிடைக்கும். ஆனால், ஃபார்மல் செட் வாங்க நிறைய செலவாகும்.

அதோடு, டிசர்டை துவைத்து மீண்டும் அணிவது மிகவும் சுலபமானது. ஆனால் ஹாஸ்டல்களில் ஃபார்மல் ஆடைகளை தயார் செய்வது பெரிய வேலை. அதெல்லாம் எங்களுக்கு ஒத்து வருவது கஷ்டம்’ எனக் கூறுகின்றனர்.

thatstamil