புகை பிடித்தால் அபராதம் : டில்லி பல்கலை அதிரடி உத்தரவு

புதுடில்லி : “கல்லூரி வளாகத்திற்குள் புகை பிடிக்கும் மாணவர்களுக்கு, 200 ரூபாய் அபராதம் விதிக்கப்படும்’ என, டில்லி பல்கலைக்கழகம் அறிவித்துள்ளது.

டில்லி பல்கலைக்கு உட்பட்ட கல்லூரிகளில், புகை பிடிப்பதால் ஏற்படும் பாதிப்புகள் குறித்து மாணவர்களிடையே விழிப்புணர்வை ஏற்படுத்தும் நடவடிக்கைகள் துவங்கியுள்ளன. முதல் கட்டமாக, கல்லூரி வளாகத்திற்குள் புகை பிடிக்கும் மாணவர்களுக்கு, 200 ரூபாய் அபராதம் விதிக்கப்படும் என, அறிவிக்கப்பட்டுள்ளது. இதற்கான உத்தரவில் பல்கலை துணைவேந்தர் தீபக் பென்டல் கையெழுத்திட்டுள்ளார். இருந்தாலும், புகை பிடிக்கும் மாணவருக்கு அபராதம் விதிப்பதா, வேண்டாமா என்பதை சம்பந்தப்பட்ட கல்லூரி நிர்வாகமே முடிவு செய்து கொள்ளலாம் என்றும் தெரிவிக்கப்பட்டுள்ளது. டில்லி பல்கலைக்கழகத்தால் புகையிலை ஒழிப்பு விழிப்புணர்வு அமைப்பு ஒன்றும் ஏற்படுத்தப்பட்டுள்ளது.

இந்த அமைப்பு சார்பில் ஒவ்வொரு கல்லூரியிலும், புகையிலை பொருட்கள் பயன்படுத்துவதால் ஏற்படும் பாதிப்பு குறித்து, ஓவியம் வரைவது, பிரசாரம் மேற்கொள்வது போன்ற நிகழ்ச்சிகள் மூலம் விளக்கப்பட்டு வருகிறது. ஹன்ஸ்ராஸ் கல்லூரியில் நடந்த விழிப்புணர்வு நிகழ்ச்சியில் பேராசிரியர் ஸ்ரீவத்சவ் என்பவர் பேசினார். அப்போது அவர், “புகையிலை பொருட்கள் பயன்படுத்துவதால் என்ன பாதிப்பு ஏற்படும் என்பதை மாணவர்களுக்கு விளக்க வேண்டும். குறிப்பாக, கலாசார நிகழ்ச்சிகள், கருத்தரங்குகள் நடத்துவது மூலமாக இதை மாணவர்களுக்கு புரிய வைக்கலாம். அபராதம் விதிப்பது என்பது கடைசிக் கட்ட நடவடிக்கையாகவே இருக்க வேண்டும்’ என்றார்.

நன்றி:dinamalar.com

முஸ்லிம் லீக் மாநாட்டில் அழகிரி பங்கேற்பு! டெல்லிக்கு டிமிக்கி

சென்னை: மத்திய உரம் மற்றும் ரசாயனத்துறை அமைச்சர் மு.க.அழகிரி இந்திய முஸ்லிம் லீக்கின் 62ம் ஆண்டு சமுதாய மறுமலர்ச்சி மாநாட்டில் பேசும்போது மகளிர் மசோதா நிறைவேற வேண்டிய நிலையில் நாடாளுமன்ற கூட்டத்தை தவிர்த்துவிட்டு, முஸ்லிம் லீக் மாநாட்டில் பங்கேற்க ஆர்வத்துடன் வந்தேன் என்று தெரிவித்தார்.

மாநாட்டில் மத்திய மு.க.அழகிரி கலந்துகொண்டு பேசுகையில், ‘இந்த மாநாட்டிற்கு வரவேண்டும் என என்னை டெல்லியில் சந்தித்து அழைப்பு விடுத்தனர். இந்நிலையில் மகளிர் இடஒதுக்கீடு மசோதா ராஜ்யசபாவில் 185 ஓட்டுகளில் வெற்றி பெற்றது.

இதற்கிடையே நான் மாநாட்டிற்கு வருவதற்காக விமான நிலையத்துக்கு புறப்பட்டேன். நாடாளுமன்றத்தில் மசோதா நிறைவேற்றப்பட வேண்டியுள்ளதால் நீங்கள் டெல்லியிலேயே இருக்க வேண்டும் என சகோதரி கனிமொழி என்னை போனில் தொடர்பு கொண்டு கூறினார். நான் மாநாடுக்கு வருவதாக வாக்குறுதி அளித்துவிட்டேன். என் மீது மக்கள் வைத்திருக்கும் நம்பிக்கை வீண் போகக் கூடாது என கூறிவிட்டு வந்து விட்டேன் என்றார்.

மேலும், எனக்கு பதவியை பற்றி கவலையில்லை. மக்கள் என்மீது வைத்துள்ள அன்பு தான் பெரியது. இஸ்லாமிய சமுதாய மக்கள் என் மீதும், தலைவர் மீதும் வைத்துள்ள அன்பு 100 வயது வரை முதல்வரை பதவியில தொடரச் செய்யும்.

1947ம் ஆண்டு முதல் 1962 வரை அமைச்சரவையில் முஸ்லிம் அமைச்சர்கள் யாரும் பதவியில் இல்லை. முஸ்லிம்களுக்கு அமைச்சரவையில் வாய்ப்பு கொடுக்க வேண்டும் என அண்ணாதுரை குரல் கொடுத்தார். இதனால் கடையநல்லூர் மஜித் அமைச்சரானார். தொடர்ந்து இன்று வரை பல இஸ்லாமியர்கள் எம்எல்ஏ, எம்பி, மாநில அமைச்சர்கள், மத்திய அமைச்சர்கள், வாரிய தலைவர்கள் பல்வேறு பதவிகளை அளித்து திமுக கவுரவித்து வருகிறது என்றார்

இந்நேரம். காம்